Asturianos na Guerra
Cuba
Nesti añu 1998, fae cien años de les derrotes militares en Cuba y
el Pacíficu, que pusieron-y fin al imperiu español, surdíu
a partir de los Reis Católicos. Aprovechando una exposición que
se ta fayendo nel Museu del Pueblu d'Asturies, en Xixón, vamos falar
güei de los asturianos na Guerra Cuba.
Dende mediaos del sieglu XIX, el movimientu separatista cubanu fue espolletando
y ficieronse tres guerres: la Guerra Grande o Guerra los Diez Años
(1868-1878), que terminó cola paz de Zanjón; la guerra Chiquita
(1880) y la de Independencia propiamente dicha (1895-1898). Estados Unidos,
qu'entamaba la so política imperialista, apoyó a los separatistes
cubanos y declaro-y la guerra a España.
Cuba fuera, ente tolos países americanos, el principal acoyedor
d'emigrantes asturianos. Enantes del gritu d'independencia, el 10 d'octubre se
1868, más del 90% de la emigración asturiana a América
concentrabase en Cuba.
Nes víspores la guerra los Diez Años, rexistrábense en
Cuba cerca de 9.000 asturianos (el 10% del total d'españoles), pocos
menos que canarios y más o menos los mismos que catalanes y gallegos.
Ente 1859 y 1862, de los más de 8.500 asturianos que solicitaren
pasaporte nueve de cada diez diben pa Cuba. Alendefetu, teníen una
organización política y social de les más actives de les
afincaes na isla.
Un nutridu grupu d'asturianos taben integraos nos cuerpos de "Voluntarios
del Comercio", que ya teníen llarga esistencia dientru la
organización colonial de Cuba y que habíense creao pa suplir la
escasez de les fuercies militares, magar que bramente les sos actividaes nun
diben más allá de llucir los uniformes en desfiles una o dos
veces al añu.. Estos batallones taben formaos por civiles, salíos
de les capes medies de la emigración o fíos cubanos de
peninsulares, con edaes entre 18 y 50 años. Los Voluntarios del Comerciu
sólu en contaes ocasiones fueron al frente y la so actividá fue
fundamentalmente urbana, como grupu paramilitar.
El términu voluntarios fue aplicáu mesmamente a los mozos
reclutaos n'España pa dir a combatir na Guerra Cuba, que fueron munchos.
Dafechu, el éxercitu español convirtióse n'otra vía
migratoria, que xugó un papel perimportante na estructura social de la
isla, al convertise'l soldáu nun componente más o del paisaxe
humanu de la colonia.
En noviembre de 1869, demientres la guerra los 10 años, Asturies
envió a Cuba el denomináu Batallón de Cazadores Covadonga,
integráu por 1000 homes y patrocináu pola Diputación
Provincial. El so recibimientu na Habana convirtióse nuna aparatosa
ceremonia d'exaltación patriótica, con discursos, desfiles,
homenaxes y bienvenides. Cuando los llicenciáron 6 años
dempués, en 1875, sólu un terciu de los paisanos que
habíen salío d'Asturies volvió pa casa. El restu, morriera
na batalla o atacao poles enfermedaes tropicales.
En 1877, creáse en Cuba la Sociedad Asturiana de Beneficiencia, con
fines asistenciales, y que sería'l embrión del Centru Asturianu
de l'Habana, Institución Benéfica de Instrucción y
Recréu , fundáu'n 1886. Al estallar la guerra de 1895 yera
d'esperar qu'Asturies, proxenitora del colletivu más nutridu e
influyente de les colonies peninsulares en Cuba, mostrara un significativu
interés pola situación na isla. El desastre cubanu o el desastre
de 1898, que asina fuera nomao, vivióse con especial intensidad y fue
l'únicu sitiu d'España onde fue posible reclutar y equipar un
batallón enteru. En 1896 creóse el Batallón de Voluntarios
del Principáu, formáu por otros milenta homes y promovíu
pola nomada Xunta del Principáu pa la Defensa de Cuba, presidía
pol Obispu d'Uviéu, Ramón Martinez Vixil. La despedía
d'esti batallón fue muy destacada pola prensa asturiana y tuvo
carácter popular. Nos periódicos El Carbayón y El
Corréu d'Asturies, quedaren plasmaos tolos pormenores del
acontecimientu. Dióse-yos un banquete pa marchar y fueron
despedíos nel Musel ente aplausos y vítores. Pa facilitar la
asistencia a los actos cerrarónse tiendes y fábriques.
Esti amor patriu y entusiasmu popular fueron cayendo en picáu a
medía que pasaba la guerra n'Asturies y en toa España. Cuandu
retornen los combatientes enfermos y derrotaos, a partir de setiembre de 1898,
encontraránse cola indiferencia y na miseria. Les derrotes de Cavite,
nel Pacíficu y de Santiago, en Cuba, fueron sancionaes por el Tratau de
París n'avientu de 1898 cola pérdida de Filipines, Cuba y Puertu
Ricu. Fue'l fin del suañu imperial y l'aniciu d'una profunda crisis de
la conciencia nacional, que puso en cuestión tol réximen
políticu de la Restauración.
La emigración nun se interrumpió col fin de la dominación
colonial española na Isla, sinón qu'entoavía
alcanzó les cotes más altes nes primeres decades del sieglu. Inda
güei, la presencia asturiana en Cuba ye perimportante y son munchos los
vínculos ente les dos comunidaes.
Pese al impautu la derrota, la sociedá asturiana pareció
recuperase prontu del desastre. La repatriación de capitales indianos en
1898, contribuyó al llámau auge de fin de siglu, sofitó la
espansión carbonera y metalúrxica d'esti y tuvo parte na nacencia
d'una banca rexonal. Pero ésta, ya ye otra historia.
Pilar Sánchez Vicente
|
