a organografía popular astur amesta los instrumentos musicales de más raigañu colos que truxeren tiempos y modes. La base rítmica del baille antiguu son los panderos y panderetes, siempre femeninos. Nes manes de los bailladores, les castañueles y los pitos respuenden al ritmu de los panderos y dan ocasión al llucimientu individual. Cuando nun hai posibles, adáptense los preseos de la casa, el vanu y la payella tamién acompañaron al baille; esta creatividá ta perviva nos instrumentos de vientu de fechura casera, quiciabes los más variaos: cuernes, berrones, xiples de güesu, zamploñes de centén... nuna tradición pervieya que xi Asturies pué rastrexase casa per casa. Más serondiega, y venceyada a la romería, ye la parexa de gaita y tambor. La hestoria de la gaita (1'instrumentu más afitáu na cultura popular asturiana) ta documentada na Baxa Edá Media, anque'1 tambor, na so forma d'angüañu, tien el so aniciu nes bandes militares del sieglu XVIII. Otros instrumentos melódicos de gran puxu foron el vigulín y la zanfonía, que sonaron en mercaos y feries nes manes de ciegos méndigos, xunto al bombu, la pandereta o los fierros. El clarinete y 1'acordión aportaron a la música astur nel sieglu XIX pola influyencia de la cultura urbana, como dellos sonadores mecánicos -pianoles y organillos- que, al entamu del sieglu XX, ficieron perder veceros a los músicos tradicionales. La toná ye la forma musical de mayor prestixu, algamando'1 significativu nome de canción asturiana. Ye perfloreada, desixe bones cualidaes físiques y cántase en solitariu, a la rueda'l carru'1País o al son de la gaita nun ritual que se caltién puro. Los tipos de toná estrémense per zones xeográfiques (Carreñana, Allerana) o polos conteníos (minera). No tocántenes a les formes coreográfiques, n'Asturies conviven dos conceptos dixebraos: les dances y los bailles. Les primeres tienen un calter más solemne y nelles aldovínase un primitivu sen máxicu-ritual comu manifestaciones de muncha perduración a lo lluengo'I tiempu. Ente les qu'entá se caltienen güei tan el Corri-Corri de Cabrales, la Lluita de Bual, les dances de palos y arcos, la danza pelegrina y la Danza prima, con delles variantes d'otru sen yá más festivu. Ente les desaniciaes destaquen les d'espades. Los bailles, la otra forma coreográfica, caracterícense por movimientos más llibres y folixeros y por ser más amenes a los cambios y modes; hai dellos tipos: bailles a lo suelto (xota, saltón, muñera y pericote), a lo agarrao (valsiao, pasodoble, polka, rumba, etc.), bailles de corru (xirandiles, cariao) y bailles de xuegu (ríu verde, la raposa, etc.)