I. La importancia de los medios de comunicación
II. La presencia de la llingua nos medios de comunicación
III. Principales midíes normalizadores
Na sociedá d'anguañu, una llingua minorizada que nun s'emplegue na radio, na televisión y na prensa tan nuna desventaxa pergrande respeutu de la llingua dominante. Por sí mesmos, los medios de comunicación representen un usu formal y prestixosu del idioma al que tienen drechu los usuarios; son, amás, una potente ferramienta d'espardimientu llingüísiticu.
Hai tiempu que se vien encamentando a los poderes públicos y a tou tipo de muérganos alministrativos o socioculturales pa qu'afiten una presencia mínima de la llingua nos medios de comunicación asturianos. Pero depués de pasar diez años dende qu'entamaren los primeros trabayos nesi sen, anguañu nun se ve qu'hubiere nenguna meyora nin nos medios de comunicación más favoratibles pa ello nin tampocu naquellos con más futuru comu los audiovisuales.
Anque se dexó bien a les clares que yera pernecesario algamar nos medios audiovisuales una presencia mínima (más que nes lliteraries, fundamentalmente con preferencia nes estayes didáutiques y, sobremanera, informatives), nun se llogró un res. Mentantu, aumentaba xeométricamente'l númberu d'escolinos nos colexos asturianos, cola non obligatoriedá comu bandera y resalvando munchos pilancos que se yos poníen a los pas y mas p'algamar el drechu a que'l so fíu deprendiere la llingua de so por aciu de la enseñanza formal. Agora, esos neños que van espolletando y faciéndose adolescentes, atópense con que nun tienen medios de comunicación que yos ufierten canales d'información y d'averamientu a l'actualidad na llingua qu'adeprendieron.
¿Qué quier dicir esto? Que de poco val consiguir que la ufierta d'enseñanza de la llingua asturiana se xeneralice a tolos colexos, comu ye normal, y menos val l'esfuerzu de tantos y tantos maestros, de tantos neños y tantos pas, si nun hai una continuidá que namái se pue llograr al traviés de los medios de comunicación de mases. Una continuidá social y non escolar o académica. Ente otres coses, porque ye al traviés d'esos medios de comunicación per onde los adolescentes acceden a la mayor parte de la información y de les enseñances socioculturales y sociollingüístiques nesa edá fundamental de la formación de la persona.
Naquelles dómines de les que falamos, hai yá diez años, esixíase que los que ficieren cualuquiera que fore'l trabayu periodisticu na nuesa llingua, de forma continuada, pertenecieren al mediu mesmu; esto ye, que foren periodistes. Y nesti momentu namái qu'una pareya o dos de periodistes s'enfoten por escribir nos medios n'asturiano o por emplegar esta llingua de nueso na radio. Toes estes coses estrémense bien poco de comu taben cuandu aquelles cencielles propuestes se facíen, por muncho qu'esto nos duelga.
Si tenemos la esmolición de seguir a lo llargo una selmana los periódicos asturianos, o la programación de les radios con emisión rexonal, o los programes de televisión, darémonos cuenta de que l'asturianu ta tan lloñe de los niveles mínimos que na realidá equival a l'ausencia total. Porque, anque les emisores públiques nos ufiertaren cuantayá un curtiu boletín informativu diariu na nuesa llingua y la televisión asturiana nos diera otru tanto, o anque delles emisores privaes ficieren dalgún programín, too sigue igual. Dalgún periódicu asoleya una fueya semanal n'asturianu y otru, amás d'eso, enxerta davezu noticies y artículos d'opinión, pero nun tamos namái que delantre d'un enfotu testimonial, que de xuru nun tien continuidá nin hai posibilidaes de que la tenga con un ciertu procuru profesional.
En primer llugar, nos periódicos sigue aumentando abondo dende hai unos años a esta parte'l númberu de cartes de llectores que tán escrites n'asturianu. Y eso, anque nun seya indicativo de la presencia real de la llingua nel mediu, sí nos ufierta'l datu de que ye bien valoratible'l númberu de llectores dispuestos a facer bon usu d'esa llingua arrequexada. Pero, d'otramiente, la presencia del asturianu sigue siendo namái por cuenta de les subvenciones o del interés de tal o cual profesional qu'arrecostina con más trabayu del que pue facer y que col so voluntarismu llogra dalguna apaición significativa y interesante en llingua asturiana nesta o na otra páxina.
Si falamos de periódicos concretos atopámonos con que l'únicu que caltién una cierta presencia del asturianu, anque non dafechamente afayadiza, ye El Comercio de Xixón. Nesti periódicu sigue espublizándose toles quincenes una seición nomada «Alitar Asturies» que ta formada por dos páxines nes que s'arrecueyen noticies lliteraries y socioculturales que tienen que ver cola llingua asturiana. Pero la so conceición ye la mesma que si se tratare d'un suplementu selmanal o cultural y nun hai munchu enfotu en qu'apaeza dafechamente enxertáu na cadarma xeneral del periódicu.
Per otru llau, La Nueva España, quitando dellos artículos d'opinión nun asturianu más bien «coloquial», nun arrecueye más que dalgunes collaboraciones lliteraries nel so suplementu lliterariu o, sobremanera, nel suplementu asturianista «La Nueva Quintana», que tien un calter más etnográficu o cultural y onde avecen a apaecer artículos n'asturianu.
Los periódicos locales, diarios comu La Voz de Avilés o semanarios comu El Oriente de Asturias o El Fielato, nun tienen una presencia activa nel discutiniu qu'arrodia'l procesu normalizador del asturianu nin hai nes sos páxines presencia abonda de collaboraciones más allá de dalguna páxina de ralo en ralo. Estas páxines, comu otres qu'apaecen en semanarios gratuitos comu La Hora de Asturias, en revistes universitaries o n'otru tipo de publicaciones culturales, respuenden a la política desarrollada dende'l Serviciu de Política LLingüística y non a un enfotu específicu de los editores, anque en dalgún casu si pue vese cierta esmolición pol espardimientu y normalización de la llingua asturiana.
Hai una xebradura ente la situación real y les aspiraciones de la xente reflexaes nes encuestes. En 1985 un 59% de ciudadanos queríen l'asturianu na prensa; en 1989, a un 85'65 % paecía yos bien que s'espublizaren revistes y periódicos namái n'asturianu; y en 1991, la presencia de la llingua en periódicos y revistes considerábase dafechamente insuficiente pol 56%, más de la metada de los encuestaos, cuasi triplicando a les persones que consideren abondo la presencia del asturianu, namái qu'un 26%. Según esti últimu estudiu, los asturianos piden la presencia de la llingüa asturiana en tolos medios impresos, hasta'l puntu de que dos de cada tres asturianos nun veríen mal qu'esistiere dalgún periódicu o revista dafechu n'asturianu.
Si murnia ye la presencia de la llingua asturiana nos medios escritos, peor entá la atopamos nos audiovisuales. Ye bien penoso que haya güei menos presencia del asturianu (col doble, y mesmamente'l triple d'hores y espacios de programación) na radio y na televisión públiques que cuandu hai diez años entamaben los primeros esfuerzos.
Hai diez años, nos boletinos informativos de Radio Nacional d'España n'Asturies ufiertabase dalgún resume en llingua asturiana y lo mesmo se facía colos programes informativos de TVE, «Panorama Rexonal», y hasta había un programa selmanal específicu fechu en llingua asturiana. Anguañu nenguna de les emisores de radio y televisión públiques ufierta espacios n'asturianu. No que se refier a les emisores privaes el panorama ye igual de probe y nun camudó un res nestos últimos años. Les úniques apaiciones esporádiques, como boletinos informativos en llingua asturiana en dalguna emisora comercial o secciones n'asturianu, son pola mor de subvenciones de la Conseyería de Cultura y mui poques veces por enfotu personal de dalgún periodista.
La radio ufiertanos una presencia insignificante no que cinca al emplegu la llingua na programación, pero non na emisión real. Quier dicise que la llingua asturiana ye malpenes emplegada polos periodistes o locutores de les nueses emisores pero nun asocede lo mesmo con otros protagonistes tan importantes comu ellos no qu'al cómputu se refier: los oyentes. Porque nestos momentos, pese a que'l conteníu informativu ye dende hai tiempu perimportante na programación, entá s'alcuentren a la cabeza de les programaciones de les emisores d'onda media los «magazines», onde la participación del oyente ye fundamental. Y esa participación faise con una presencia clara de la nuesa llingua, non sólo nes emisores locales sinón nes emisores d'ámbitu asturianu, cosa que nun ye más que'l reflexu d'una realidá llingüística mala de tapecer. Sicasí, el fechu de que los entrevistaos, la xente de la cai o dellos políticos usen más o menos l'asturianu nos medios de comunicación malpenes supón un avance porque nun suel haber un usu consciente y desprexuiciáu del idioma, dándose amás situaciones bien chocantes onde, anque l'entrevistáu fale n'asturianu, l'entrevistador siempre fala nun perfeutu castellanu ensin nenguna concesión pa con la fala asturiana. Detrás d'estes actitúes, munches veces de tipu personal, ta la llinia ideolóxica que marca la direición de la empresa periodística.
Onde realmente interesa pal procesu de normalización, na programación, nun hai un res de presencia. Too ello esfrónase colo que les encuestes reflexen, lo que paez danos a entender que los medios de comunicación asturianos nun son un espeyu de la sociedá de nueso, sinon qu'arrecostinen con una inercia de desdexamientu hacia los valores culturales y llingüísticos d'Asturies más propia de décades pasaes. Si en 1985 el 57% de los encuestaos pidía qu'hubiere programes n'asturianu na televisión, en 1991 a un 64 % de los asturianos paez yos probe la presencia del asturianu nos programes de radio y televisión y una bona mayoría pide emisores de radio (63%) y televisión (59%) dafechamente n'asturianu. Quitando un 11% de los encuestaos, toos se manifiesten favoratibles a qu'esista en tolos medios de comunicación audiovisuales d'Asturies, en distintes gradaciones, una programación na nuesa llingua. En resultancia, polo menos 8 de cada 10 asturianos quieren qu'haya una presencia curiosa de la llingua na programación de les emisores de radio y TV de cobertura autonómica.
Ta claro que datos comu estos xustifiquen la esistencia d'una canal autonómica en llingua asturiana, pero en cuentes d'eso, los gobernantes de nueso falen de problemes económicos y de falta d'interés p'Asturies de proyeutu talu.
No postrero, nun podíemos dexar tampocu de referinos a otres estayes que, anque la xente nun les meta nel mesmu sacu que los periódicos, les radios o les cadenes de televisión, sí son tamién, en mayor o menor midida, medios de comunicación. Del cine asturianu poco se pue dicir, a nun ser dalgún cortometraxe n'asturianu subvencionáu a costa fecha. Sí paga la pena falar del mediu fonográficu, porque ye bien altu'l númberu de discos asoleyaos nestos últimos años de música (seya o non tradicional) emplegando l'asturianu pa lletres y pa los creitos de les carátules.
A pesar d'alcontranos nun momentu revolucionariu dende'l puntu de vista de la tresformación radical de los medios de comunicación, hasta el puntu de que ya entama a falase (y lo que ye más importante, a vese) el fin de la era Gutemberg, la idea xeneralizada ye que la presencia más prestixosa que pue llograr una llingua ye la impresa. D'esta miente, tolos enfotos de nueso siguieron nos caberos años empobinaos a qu'esa presencia fora grande nos periódicos, afitándonos na idea tradicional, la más repitida pola mayoría y, más entá, polos sectores intelectuales, de que tolo que seya impreso tien más pesu específicu qu'eses pallabres y imáxenes que lleva'l vientu. Y esi ye un error que tien de desaniciase dafechu si se quier algamar la normalización del asturianu nos medios de comunicación.
Anque seya perimportante qu'haya secciones n'asturianu nos periódicos
asturianos, esi llabor nun ye'l fundamental. Pue haber enantes otros
medios nos que llibrar batalles de xuru más fáciles de
ganar, más sofitaes pol interés de la xente y menos costoses
y llargues.
• Atrocar y asegurar la presencia nos medios de comunicación públicos (radio y televisión) de programes n'asturiano o onde s'emplegue l'asturianu al llau del castellanu.
• Fomentar l'emplegu normal de la llingua, ensin arrequexala a espacios específicos de conteníu asturianu.
• Entamar un plan de subvenciones a medios privaos que garanticen un emplegu normal del asturianu, dientru d'unes llendes razonables y con total control del so emplegu.
• Dir a la criación por parte de los poderes públicos d'una radio y una televisión autonómiques sofitaes na nuesa diferencialidá cultural y llingüística y comprometíes cola nuesa realidá sociocultural y económica.
• Sofitar el xurdimientu de medios de comunicación dafechamente en llingua asturiana, seya por parte de la iniciativa pública o por parte de la privada y seyan los que seyan los formatos qu'algamen (radio, televisión, medios impresos, nueves tecnoloxíes, etc...), comu garantía de llibre escoyeta llingüística de los/les ciudadanos/es.
• Poner en marcha iniciatives qu'ufierten una cadarma informativa en llingua asturiana:
a) Al traviés d'emisores locales de radio o televisión, seyan de corte asociativu (entamaes por asociaciones vecinales o culturales) o d'algame municipal (entamaes polos Conceyos).
b) Facer alitar y esparder iniciatives de radio escolar dafechamente centraes na cultura de nós y feches n'asturianu.
• Facer xurdir nes estayes llaborales, sociales, escolares o académiques onde nos atopemos cartafueyos, boletinos de comunicación empresarial o sindical, cartelos, ecétera, onde s'emplegue siempre l'asturianu. Y encamentar darréu a los sindicatos y les organizaciones empresariales que faigan usu del asturiano al tiempu que del castellanu y nes mesmes condiciones (notes de prensa, notes de comunicación interna, etc...).
• Al empar de toes estes midíes, los sectores más esmolecíos pola reivindicación llingüística tendríen que tener comu llinies d'actuación:
a) Centrar esfuerzos nel campu de la información.
b) Sofitar la esistencia n'Asturies d'enseñanza reglada de Ciencies de la Información que permita l'estudiu optativu de la llingua asturiana nos planes formativos. Too ello, en combinación col afitamientu de la especialidá de Filoloxía asturiana.
c) Afitar la formación y preparación de traductores especializaos mínimamente nel campu de la información, pa poder asina ufiertar material abondo pente medies de les axencies d'información esistentes, o otres que pudieren xurdir, a los medios qu'entamaren el so llabor en llingua asturiana.
d) Trabayar nun estándar llingüísticu con urxencia que seya amañosu non tanto dende un puntu de vista lliterariu comu dende'l puntu de vista del mensaxe informativu puru. Pa ello fadría falta afondar nes estayes afayadices del mundu de la información espectáculu: política, sucesos, deportes mayoritarios, información meteorolóxica, etc.