Ye'l tiempu de
suañar
Nun se sabe mui bien cuál ye l'orixe del antroxu. Nel mundu llatinu hai
varies fiestes que tienen el mesmu carácter que l'antroxu cristianu,
como les fiestes Antesteries, n'honor a Dioniso o les famoses celebraciones
saturnales romanes.
Munchos creen que ye una fiesta celta, namás hai que fixase nos antroxos
celtes del Halloween. Actualmente sábese que los rasgos principales del
antroxu apaecen en munches cultures: mazcaraes nos pueblos d'África,
n'América precolombina o nel Xapón.
N'Asturies foi una
de les fiestes más señalaes. Celebrábase en casi toles
aldees, villes o ciudaes. Hasta bien entráu'l sieglu vente cada sitiu
tenía un vezu de celebralo según les sos posibilidaes, anque polo
xeneral al nun haber munches perres lo primordial yera pasalo bien y que tol
mundu participaren de la folixa. Como nun yera posible mercar los disfraces nes
tiendes, la xente daba-y un toques d'imaxinación y de personalidá
colo poco qu'había. Por esti motivu casi too valía, dende colches
vieyes, manteles de casa o trapos remendaos.
Les
mázcares más tradicionales yeren de pelleyos d'oveya o tiestes
d'osu o mula y teles pal cuerpu. En dalgunes ocasiones p'amazcaráse
tiznábase la cara de negro con un corchu quemáu. N'otres
poníase una careta fecha de cartón, madera o trapu.
Fuxir de les rutines y suañar con otros
mundos posibles ye l'oxetivu d'esta fiesta, asina que yera típico'l
cambiu de sexu: los homes diben de muyeres y les muyeres d'home.
El vezu yera armar espolines, burlles, comedies y
xirigoncies. Pa ello en tolos pueblos asturianos había dellos personaxes
típicos. Los guirrios diben vistíos de blanco, faxa colorao na
cintura y un cinchu de cueru tremáu de cencerros que facíen
muncho ruíu al movese. Llevaben tamién una pértiga llarga
que-yos permitía saltar penriba de muries y sebes. El gorru, de pelleyos
d'oveya, yera picudu. La cara solíen tapala con una mázcara
colorada.
Otros mazcaritos famosos yeren los vexigueros, mui
asemeyaos a los guirrios pero con boina blanca. Portaben vexigues inflaes
d'animales coles que solmenaben a la xente qu'atopaben. Taben tamién los
sidros de Pola Siero, los zaparrastros y zamarrones, xunto los zancudos de
Quiros que caminaben en zancos, agora llamentablemente yá nun se ven.
Había personaxes qu'enxamás faltaben:
vieyos gorrumbos, barberos, mélicos, militares y cures. Dalgunos
entamábenla solmenando a la xente. N'Uviéu tenemos a la
Destrozona, que diba pela cai dando escobazos. Nos pueblos marineros los
pescadores ximelgaben les cañes de pescar col fin de da-yos con elles a
la xente.
Na actualidá lo normal ye mercar el disfraz
nos grandes almacenes nes que'l cine ye'l que xeneralmente impón el so
criteriu.
Nestes feches la xente aprovecha a fartucase hasta
reventar. Nun nos pue chocar, depués vien l'ayunu y l'astinencia de la
Cuaresma. El gochu ye la estrella principal: picadiyu, butiellu, morcón.
Tampoco pue faltar el pote d'antroxu, la borona o los bollos preñaos
qu'ayuden a soportar el fríu típicu d'estes feches. Yera costume
tamién los postres, sobre too nel Domingu'l gordu. Nun podía
faltar los frixuelos, les casadielles o los bollinos de vientu.
Al final de les cencerraes, los cantares y les
comparses, escúchense los lloros de les plañideres nel entierru
la Sardina y los insultos a los peleles, moñecos de trapu con figura de
persona que yeren mantiaos y apaliaos hasta acabar quemaos, enterraos o
llanzaos al mar. Con ellos morría'l tiempu de la llibertá, el
tiempu de l'allegría, el tiempu de ser por dellos díes lo que tol
añu suañamos.
Güei ye tiempu
d'antroxu
Güei ye tiempu d'humor y d'ironía,
seyamos dioses o diaños per un día
Baillemos, xuguemos, seyamos de nuevo
neños.
Critiquemos, gastemos bromes,
denunciemos.
Abandonémonos a la folixa, al xaréu y
a l'allegría.
¿Ónde taran les lates, los pitos y los
cencerros?
Busquemos tamién sartenes, turullos y
cuernos.
Güei ye tiempu d'humor y d'ironía,
seyamos dioses o diaños per un día
Disfrutemos de lo bueno y olvidemos el
decayimientu.
El menú ye mui suxestivu, comamos a
fartar,
nun pue faltar el pote, el picadiyu y el
butiellu,
nin los picatostes, los frixuelos o los bollinos de
vientu.
Disfrutemos de los bueno, con amigos de
verdá
Güei ye tiempu d'humor y d'ironía,
seyamos dioses o diaños per un día
Nun seyamos de la rutina prisioneros.
Acabemos cola monotonía tirana.
Destapemos la mirada de los
suaños,
quitémonos les mázcares que dan
pena,
seyamos por un momentu de nuevo
neños.
María Luz Pontón Álvarez
|