Carlos X. Blanco

Subscribe to Carlos X. Blanco feed
carlosxblanco
Updated: fae 8 hores 8 min

Duernu bipolar

29 Agostu, 2014

Con nome y apellíos recuerdo la sublevación de los duernistes. Asocedió cuando Cascos ganó unes Elecciones n´Asturies con un partíu nuevu: Foro o F.A.C.

Escritorinos, gafistes de pasta, folclóricos del Réxime "progresista", toos ellos sofrieron un tremedal talu, tan descomanáu, qu´ellos yá salíen nes semeyes movíos, como si carecieren de cuarenta de febre. Los "progresistes" desaloxaos del Poder o de los duernos aneciaron col so discursu -polo visto- exemplarmente democráticu: "¡Fascistes!"

 Esbocexaron consignes, polo visto, enllenes d´imaxinación y bon gustu: "FAC=FUCK", "Cascos=Facista", "Interclasismu igual a Rexonalismu Ranciu Cuadonguista"... Y suma y sigue. El casu ye que peligraben munchos puestinos, y cuando se renueva´l mandu en plaza sal un aquello de golor a alcantariyes, arrecendiendo de toles gochaes y abusos cometíos polos ocupantes anteriores de poltrona (güei tornaos y reinstalaos), les porcancies de polos usuarios anteriores de los duernos. Les ostres inxeríes en Nueva York a cargu del Niemeyer y del erariu públicu, a costa de los paganinis de siempres nun se me van dir del caletre enxamás.

El casu ye qu´hai tou un modelu d´esquierda que se funde. Yá va décades que nun se sabe bien lo que ye la esquierda. La defensa d´un modelu socialista de propiedá de los medios fundamentales de producción nun la fai yá naide en serio nestes tierres d´Occidente. Lo que vemos namás ye un catálugu de faltosaes, d´ideoloxíes multiculturalistes, de relativismos culturales, d´hedonismos pequeño-burgueses varios que, no fundamental, sirven de bona mázcara pa un reforzamientu del Capitalismu mundial y del modelu d´engorde del Estatalismu. Nun me cabe dulda que Marx sedría un bon partidariu de mandar fusilar a tolos profesionales de la política qu´agora se reclamien de "la esquierda". Tovía los de la mio xeneración, un garrapiellu, quememos les ceyes baxo´l flexo sorrayando y descrifando El Capital o los Grudrisse. Agora lo qu´hai son… tuiteros. Los duernistes "rojillos" d´anguaño nun saben faer otro qu´escribir articulinos que nun aporten más que´l sistema "Facebook" de pensamientu mínimu bipolar: deu p´arriba, "me gusta", deu p´abaxo "no me gusta".

¿Pa qué valen los articulinos "préstame-nun me presta"? Pa que los amigos y "siguidores" t´arropien nuna fola virtual d´opinión. Los anti-sistema, ensin una defensa del parasitismu y del salariu social, ensin un beneficiu poles subvenciones, ensin una tómbola de puestinos pa xente que nun se preparó na vida unes oposiciones, ensin un puestu de "lliberáu" sindical, esos, los anti-sistema, son los más acérrimes guardianes custodios del Sistema.


Categoríes: Canal Blogues

Un Xixón más atlánticu

26 Agostu, 2014




Esti veranu Xixón foi una ciudá mas atlántica. L´Arcu Atlánticu ye una actividá lúdico-cultural qu´espoxiga. Darreú, n´agostu, la cosa va camudando: entamen los conciertos horteriformes de la Selmanona (la previa al día de Begoña, 15 d´agostu, virxe patrona de la ciudá), repítense les feries taurines (en decadencia ya impuestes al bolsillu los contribuyentes como un "impuestu revolucionariu"), rolen omnipresentes les carroces andaluces percorriendo´l Muru, etc.

Yo, pamín, qúedome con Xunetu y entamos d´agostu. Ehí tenemos un Xixón más de verdá. Más atlánticu. Yo pudi ver l´asturianu con normalidá nos puestinos y nos folletos. Yo pudi ver llazos con otros países atlánticos, hermanos de nueso (esti añu, sobremanera, Irlanda). Yo pudi ver una presencia de la Cultura con mayúscula, y non de la cultura impostada y ayena (como´l casu la Selmana Negra, onde amás d´arrecender a fritanga y sofrir ruiu nun hai muncho más que cultura basoria ya impostada). Voi dir asoleyando semeyes de la Mascarada Ibérica que percorrió el paséu del Muro esti veranu, y que me prestó pola vida. La Allianza del Noroeste escomienza con estes iniciatives: trayer a hermanos nuestros del Noroeste Ibéricu y ver les traces de lo qu´un día fue una Cultura Común ya inda un Reinu Común: el Reinu Asturlleonés, el Reinu del Noroeste Ibéricu, el Reinu Atlánticu d´Asturies. Portugueses, gallegos, lleoneses, zamoranos, palentinos, montañeses… y asturianos. La mascarada, como bien de coses, amuesa enforma lo hermanos que somos.


Categoríes: Canal Blogues

Esti veranu preséntase "Nos Prietos Abilsos"

14 Xunu, 2014



Un llibru de rellatos lovecraftianos. 

Aspero que vos preste. 

Nun vais pasar muncho mieu, de verdá. Cthulu ta superáu. 

Dan más mieu los nazis, los stalinistes, los yihadistas y los etarras. 

Pero hai otros mundos que tán nesti. 

Categoríes: Canal Blogues

El mayu de los "primaveras"

27 Mayu, 2014

Hai tou un perfil de Nin-Nin, que nin estudia, nin trabaya, nin da palu y anecia por vivir nuna adolescencia perpetua. Esi perfil que vemos nos nuevos populismos y nos sos candidatos y militantes, amás de los “quincemayistes” con sofitu televisivu; Han vese coses como:

-  “Investigador en paru”

-  “Diplomáu n´Ociu Terepáuticu”

-  “Creador”  

Y coses d´esa triba. Na mio mocedá yo conociera bien de xente Nin-Nin yá daquella, xente que quier qu´un trabayu remuneráu luxosu venga a casa, pero que buscar nun busquen. Xente iletrada en materia de marxismu y historia social y que por embargu diz “que tán en contra los desagospios” o que lluchen contra “la banca”. Don Quixote tenía más armes y xacíu qu´unos neños, normalmente en paru voluntariu (“nun emigres, llucha”), con paga de papá y colchones sociales a mamplén.  Un “comunicador” na cadena onde´l Gran Wyoming “da palos a la derecha”, resulta que va ser el referente anti-sistema, y el referente del comunismo del bable y la gaita. Si el Gran Wyoming diz que ta a favor del bable y la gaita, de xuro que también lu voten n´Asturies los trescientos o cuatrocientos tuiteros y quincemayistes de la cosa soberaniega.


Categoríes: Canal Blogues

Votar pa una "Europa" muerta

17 Mayu, 2014

Yo nun pienso votar nes Elecciones Europees. Yo nun pienso mantener más a esta pila manguanes que ganen nun mes la paga d´una persona muncho más formada, culta y valoratible en tou un añu. Yo nun quiero saber res de politicones nin de politiquinos. Europa ta muerta. Rusia tien un exércitu, ye un Imperiu, tien gas. Europa nun tien exércitu, nun ye una Unidá real, nun tien gas y pierde fuelle. Europa ye´l chiringu d´Alemaña. Alemaña: un motor d´Europa que colonizó a tola periferia, periferia compradora y autoliquidada col envís de financiar la Reunificación.



España, y demás periferies, llevamos años financiando la Mittleuropa. Esaniciemos l´autosuficiencia y reducímonos a mercáu pa los sos productos manufacturaos y les sos espiculaciones financieres. Somos esclavos voluntarios y coloniales d´una Alemaña, crédulos inocentes nuna Unión pantasmal. Creímos nuna superestructura afechisca por Alemaña: milenta burócrates y directives pa camudar una potencia Económica nun xigante de pies de barru. Vuelvo a dicilo: Europa nun tien exércitu y Putin, si quisiera, ponía los tanques nel Atlánticu en menos d´una selmana de guerra. Nun hai una Europa de rexones y países, una Europa de pueblos y de comunidaes autóctones. Hai, pela cueta, miniestaos de broma y carnaval, colonies económiques d´Alemaña. Colonies d´una Europa albortada, onde nun sabemos faer Política, porque la Economía manda sobre la Política, nun carreru destructivu pa la nuesa Civilización al cien por cien. Y “Europa” nun va curiar les fronteres cuando les “avalanches” del Sur sían de miles envede cientos. O cuando Moscú, Teherán, Beijing o Rabat pongan les sos condiciones, productos, tanques. Entós, los Artur Mas, los Otegis, los “internacionalistes” de la minipolítica más provinciana, volverán a Berlín la mirada glayando por euromarcos, naguando por tanques y tropes “imperialistes”. Nun les va haber. Toos tán cégaros y ven visiones. Agora Merkel financia separatismos que, cuida, van benefeciar la nueva Mittleuropa. Mañana, esti mosaicu folklóricu va ser la tumba d´una Civilización y d´una Unión que nun fue y nun pudo ser.


Categoríes: Canal Blogues

Malditu Rousseau

10 Mayu, 2014

“Derechu a decidir”, “los pueblos deciden”... el verbu decidir ta de moda. Verbu malditu nel contestu actual de la política española. Abulta que somos toos fíos de Rousseau, esi vividor que pasa por filósofu y que metio a los fíos de so nun hospiciu pa nun tener que los mantener. Asina tamos tolos europeos: nun hospiciu agospiaos por culpa d´un mal padre intelectual. Asina vivimos n´Occidente: “güérfanos” en teoría política. El padre de la “voluntá xeneral”, la “soberanía popular” y otres invenciones. De les madres nun voi falar, porque acordase de les madres ye cayer fácil nel insultu. 


Esmuéleme pensar en qué pasaría nun referendum catalán o vascu, exerciendo, en contra la legalidá constitucional, esi “derechu a decidir” si hubiera un resultáu de 51% a favor de la independencia y un 49 % en contra... ¿en qué quedara´l decidir tan utópicu y anxelical con una tan axustada victoria separatista? Les posibilidaes balcániques y ucranianes nun son como pa dexar pa prau. A min nun me prestaría un res quedar ente l´amplia minoría unionista, sometíu a un apartheid o a una estranxería obligatoria. Pasar, de la nueche a la mañana, de ciudadanu de plenu drechu a estranxeru o miembru de “minoría protexida” nun ye carambelu de bon gustu pa naide. Amás, el coste de la “transición nacional” de los otros, d´esos nuevos estranxeros que van ser los vascos y catalanes, con tola so población castellana “asimilada” y nueves perspectives d´espansión territorial... ¿quién los va pagar? Los asturianinos, claro, en parte los asturianinos. La nuestra llingua y identidá sapozaes una vuelta más, pero en cambiu más catalanistes que naide, más vasquistes que naide. Vergoña de montera y ensalzamientu de birreta y txapela. Yo siento vergoña de que dalgún despistáu me confunda con un “soberanista”.


Categoríes: Canal Blogues