Carlos X. Blanco

Subscribe to Carlos X. Blanco feed
carlosxblanco
Updated: fae 6 hores 52 min

Ganó Zarquino.

25 Mayu, 2015


Yérase una vez una tierrina mui guapa, onde la xente vivía de lo que daba la Casería. Paecía la Comarca de los hobbits, pero fuera un Reinu, amunchayá, un gran Reinu que salvó a Europa d´una gran amenaza saurónica.


Depúes vino un foriatu, de nome Zarquino, y apienzó a engochalo too, a facer furacos nes montañes y a trayer xente d´otres fasteres, mediu muertos de fame, xente que nun yeran hobbits. Sacaron piedra prieto pa que Zarquino arriqueciera, y punxeron ximenees y fumarees irrespirables. Llegó un momentu en que cuasi yeran más los foriatos que los medianos y aquellos ficieron una Revolución. Quemaron caseríes, baltaron horros, volaron la Cámara Santa, frañeron les reliquies, apellidaron a Pelayo Bolsón de facista, proclamaron l´odiu infinitu a España, y al país hobbit y al Fascismu ubicuu, y echaron la culpia a los indíxenas medianos de nun tar favor de la Revolución o del Progresu. 


Los indíxenas medianos foron movilizaos pa sirvir café a los turistes y falar un bable oficializáu y "puestu en valor" en pro del seutor hosteleru, y hubieron malviender los praos pa facer répliques esautes de l´arquitectura de Benidorm. Los fíos de la xente que traxo Zarquino punxeron delantre de los sos apellíos foriatos los consabíos "Xicus", "Xurdes", etc. pa disimular l´odiu infinitu a la tierra que los agospió. 


De magar entós, la Comarca hobbit vota revolucionario, vota a Zarquino, vive nel pasáu preferíu, non el d´un Pelayu xenófobu y "protofascista", sinón el pasáu más recién de la Mina esencial del Cuencaminerismu esencial, de la Revolución altermundista, de la Primavera eterna onde hasta los vieyos vuelven a tener acné y esplosión d´hormones. Onde PODEMOS pautar colos Zarquinos de tola vida, y convertirse en reservoriu bablegaiteru, mediupensionista y básico-rentista d´Occidente.

Categoríes: Canal Blogues

Anschluss...

23 Mayu, 2015

Anschluss...


Agora que yá nun ye quien a defendese, porque´l nuestru amigu Vilareyo descansa pa siempres, nun puedo callar nin un día más. Quiero denunciar una maldá y una insidia que se llevanta, va años, contra les sos teoríes. Primero, porque ye mentira, segundo porque ye una maldá y una "reductio ad hitlerum" de lo más despreciable.

Dizse davezu que Vilareyo defendía un Anschluss pa territorios vecinos al actual Principáu d´Asturies. Y dizse asina, usando´l términu alemán que, inocentemente tornáu vien a significar "anexón". ¿Inocentemente?

Anexón puesto n´alemán yá moviliza referencies nacionalsocialistes, imperialistes, supremacistes. Yá supón imponer un nuevu status quo contrariu a la voluntá de los suxetos, que se camuden con ello en víctimes pasives d´una ideoloxía fanática.

Pues ye mentira. Ye una mentira indina.

Vilareyo nun defendió dengún Anschluss, y namás que tuvo´l bravén de facer lo que cuasi naide más fizo: divulgó los rasgos d´asturianidá qu´hai fuera de les actuales llendes alministratives de la Comunidá Autónoma del Principáu d´Asturies. Eso ye ser "hitlerianu", "tronáu" y "friqui". Eso sí, pero lo de querer entemecer trotskismu con asturianismu, o pasear a portavoces del Réxime Norcoreanu, o poner estrellines coloraes na bandera de toos... eso nun ye ser "friqui" y "tronáu".

Atopáime dalgún testu de Xavi onde diga qu´hai que "anexonar" un cachu de territoriu, y amás ensin contar cola conciencia d´asturianidá recuperada de los sos propios habitantes. Atopáime dalgún proyeutu anexonista nel sen políticu o violentu na so obra, na so teoría sobre Les Asturies. Esta insania, el presentar a Vilareyo como un cuasi-nazi, emplegando la palabrina dichosa, Anschluss, hai que la denunciar. Y voi dir denunciándoles por llealtá y respetu al que nun se pue defender yá, Defendese del entafarramientu al que nos vemos sometíos de contino aquellos que queremos pescudar la nuestra identidá, dientro y fuera de les actuales llindes alministratives.


Categoríes: Canal Blogues

Contra vientu, marea y friquismu: un nacionalismu identitariu.

4 Abril, 2015

Un garrapiellu de persones yá llevamos años tratando de poner xacíu nel tarrén de la defensa de la identidá asturiana contra vientu y marea. ¿Efeutivos, humanos y materiales a la man? perpocos. La gran ferramienta pal nuestru trabayu ye internet. Los blogues y les redes sociales, d´usu gratuitu, y una masa pequeña y entá silenciosa, de llectores y siguidores son los nuesos aperios y los nuesos meyores aliaos. Cuando entamemos con esta xera, va unos cuantos años, creyendo nun nacionalismu vidable, democráticu, integrador de delles corrientes y estilos, con posibilidaes d´algamar representación institucional y prestixu social, nun podíamos aldovinar qué murniu futuru inmediatu-y quedaba a esta forma de vida y pensamientu que ye ser “nacionalista asturianu”.

a)  Nun sospechábemos que les “organizaciones independientes” de la reivindicación llingüística fueran o tan inactives o tan sectaries. Vimos, con plasmu apocayá, cómo dalguna d´eses asociaciones daba palos a los políticos responsables de la tema llingüística siempre que yeran d´un signu dau, pero callaben la boca como los mures énte los maltratos a la llingua daos recientemente polos Podemizaos y en xeneral, polos políticos izquierdistes.

b)  Nun sospechábemos que la reivindicación llingüística diba dar abellugu a les tesis más absurdes y friquis, como por exemplu les tesis galleguizantes de Ramón d´Andrés y Cía. Lleendo los blogues d´algunos mozos desnortiaos, vemos con horror que la Reivindicación de la Oficialidá del asturiano faise de la man d´una reivindicación del gallego (sic), del gallegu ensin más (non del eonaviego, non del “gallego-asturiano”) sinón del gallego a seques. De paso, yá nun esiste, nesti xuvenil friquismu del astursoberanismu, una “Llingua Asturiana”. Falen d´un “asturlleonés”. Esta ye la nueva dómina del autoodiu astur. La inquisitoria más elemental llévanos a entrugar ¿a quién beneficia esto?

c)  La Podemización de cuasi tola “esquierda soberanista” cola esceición d´Andecha Astur. La irresponsabilidá de los galleguistes mencionaos arriba, xúnese a la enorme irresponsabilidá, traición y oportunismu de los que yá tol mundu conoz como “comunistes del bable y la gaita”, procedentes del Bloque pal Engañu, Compromisu, UNA y milenta sigles microcorpusculares. Estos personaxes agora formen parte minoritaria de la Sucursal asturiana del Partíu de corte y confección madrileñista, Podemos, y afáyanse nuna situación llaceriosa, que yá nun tien igua ¿Por qué? Porque los Podemistes nun tán pol bable, saben que-yos quita votos o que lo ven como un “inventu pequenu-burgués”. Los Podemistes nun evolucionaron muncho dende los vieyos tiempos del Carrillismu, del Leninismu o de la Pasionaria. Son los mesmos de siempres. Una España Roxa enantes que Rota. Una de dos, o eliminen a los bableros, o los promocionen a puestinos garbanceros pa que callen yá d´una vez colo del bable. Lo que yá ta claro ye qu´esta xente ye irrecuperable pa la causa nacional d´Asturies. Y pue ser qu´acaben dándose mamporrazos unos a otros, como ye norma nellos, y los “hermanos mayores” del Partíu madrilanu de Pablo Iglesias acaben vacunándose dafechu del virus bablerogaiteril, porque toos estos ex-andechos, ex-darreus, ex-soberaniegos, etc., siempre acaben armándola bien gorda. Acabarán echándolos por orde de Madrid.

d)  De toles maneres, los bableros podemizaos pertenecen a dos tueros fáciles d´estremar. Unu, el de la beautiful people y la gauche divina que fuera reclutada alredor del Selmanariu “Les Noticies”. Xente feliz, con pás que tienen xalé y Mercedes Benz, xente universitario, con titulín y llibrín espublizao, asturianistes de salón, poetes que brinden con xaculatories a la lluna, esquisitos posmodernos, mundín de la edición subvencionao, folclóriques del Réxime FSA-IU-Bloque, paniaguaos que piden un requexu na RTPA, ripiadores, feministes ensin noviu, “indignaos” funcionarizaos, etc.  Esti grupu usó la llingua asturiana p´alquirir notoriedá, en xeneral ye anti-nacionalista acérrime y ta en procesu de re-castellanización total una y bones ingresaron en Podemos. Completaron el círculu, vamos.

Ésti caberu grupu ye distintu al de los bablegaiteros “soberaniegos” que nun camudaron modales y retuiteen a los bildus, piden llibertá a los oteguis, y nun saben usar l´asturianu como nun sía per aciu del “Eslema”. Pero toos xuntos tán podemizaos. Van acabar echándolos, a unos y a otros yá vereis. Munchos son xente fato y ineficaz. Los llistos llegarán a conceyal del so pueblu. Los nacionalistes identitarios d´Asturies tamién los esborriamos de la llista cuantayá.

Mamina ¡Qué duro ye ser pesimista, o sía, realista bien informáu!


Categoríes: Canal Blogues

Superhérues y Mártires

14 Marzu, 2015

Hai munches mentires nel nacionalismu asturianu y na reivindicación llingüística. Lleendo en blogues, entrevistes, artículos o redes sociales, abúltame que son milenta los "superhérues" de la defensa de la llingua.

Esto, señores, nun me paez serio.

L´asturianu, nel so usu normalizáu, pue acarretar problemes personales y situaciones de discriminación llingüística, pero lo que nun ye granible ye pretender ponese de mártire o hérue de la defensa del idioma inventando situaciones o magnificándoles. El xuegu de farol yá causó bien de camarzos y falses espetatives nel movimientu nacionalista astur.

 Estos "super-hérues" y "mártires" avecen decir:

"Cuasi perdí´l mio trabayu por defender membretes, toponimies, impresos, etc. n´asturiano"

"Presenté una tesis o dalgún otru trabayu académicu y echáronmelu p´atrás"

"Pidí al xuez declarar nel mio idioma y nun me dexaron"

Etc.

Hai que tener muncho procuru nesto de facese les víctimes, porque darréu vien un efeutu rebote, onde se cuerre´l riesgu de perder la credibilidá d´una causa noble y xusta, y too por culpia de la magnificación o distorsión de los fechos. Col pasu´l tiempu yo fui viendo que bien d´esos "mártires y superhérues" lo que quixeron fue namás que ganar notoriedá dientro la so propia parroquia, sindicalera, bablegaitera, etc. y que, agora, n´habiendo una Sucursal prometedora pa mamandurries varies, el castiellán-yos apaez como idioma perfechu col que medrar y facer propaganda y autobombu. Los mesmos que llarimaben al estilu cocodrilu por nun poder usar l´asturianu, agora arrequéxenlu con gustu, porque... "podemos"..., "semos" y... "ganemos". Esta xentecaya ha ser espulsada del movimientu nacionalista. Son la traición con rostru y piernes.


Categoríes: Canal Blogues

Satelites bablegaiteros del PSOE y IU (y el tiempu sigue dándome la razón?

6 Marzu, 2015

IAS y Zapico ingresen n´IU 


De manera absolutamente previsible, Faustino Zapico y el so grupúsculu zombie, n´estáu d´hibernación demientres la formación de "Compromisu", (previu desembarcu d´esti inventu en Podemos) FICHA, depués de munchos cortexos, por IU.
Nunca nun nos equivoquemos los que dixéramos que les ideoloxíes de los bablegaiteros del estilu de Zapico y la d´IU, satélite del Réxime socialista qu´afaró´l País, yera indistinguibles. La podemización del "asturianismu" xunto a la formación de satélites concéntricos a IU y PSOE son fenómenos cantaos, previsibles, dotaos lóxica interna y necesaria. De llibru. El tiempu sigue y sigue dándome la razón.

Velequí´l comunicáu: "Esta mañana anuncióse formalmente l’alcuerdu electoral al que llegaron en Mieres Izquierda Asturiana (IAS) y Izquierda Unida (IU). Como resultáu del mesmu, un compañeru d’IAS, Faustino Zapico va formar parte de la llista electoral d’IU nel conceyu, que vuelve a encabezar l’actual alcalde Aníbal Vázquez. Nel casu de ganar les elecciones, el nuestru compañeru formará parte del próximu equipu de gobiernu.   L’alcuerdu aprobóse nuna asamblea de militantes el pasáu 23 de febreru onde marquemos les llínies que dende IAS yeren innegociables: la inclusión del conceyu abiertu como forma participativa d’ellaboración del presupuestu municipal, l’aplicación d’una política llingüística tresversal en tol conceyu y la oposición a los pautos col PSOE. N’aprobando eses llínies IU, entamó la ellaboración del programa electoral, nel que tamos participando y nel qu’IAS aporta la so visión y compromisu, asina como les sos propuestes y planes, que venimos ellaborando dende va años y coles que yá mos presentemos a les elecciones nel conceyu n’anteriores convocatories.   Anque esti alcuerdu ta circunscritu namás a Mieres, ta abierta tovía la negociación n’otros conceyos, de lo qu’informaremos nos próximos díes.   Dirección Nacional d’IAS Uviéu, 6 de marzu de 2015 - "See more at: http://www.ias.as/izquierda-asturiana-ias-llega-a-un-alcuerdu-con-izquierda-unida-iu-nel-conceyu-de-mieres/#sthash.LaeryTbM.dpuf
Categoríes: Canal Blogues